Ja no ær a har ijan, å ær bløvan åpfårdra te å skryv an jyvlhistori, på dialækt, mæn a hår int rejti no jyvlhistorier, mæn i ma ta te tak mæ an nytorshistori, såm ær saj, a hår sil åpløva dæj.
De leer hilt trbaj te 1963, helar dær omkring, dæ hae snea hila davi, dæj sist da på oar, lie føri de bæøv mørkt, kam rutabilan å sku te Sæby, mæn 5 minutar ætar kam dæj te baj i bakgær, å fårtsay hilt u te tjømaj, de var an tur på jan kilometar.
Å vi hær i met hjæm hålt vå nytorsautan, mæ ålt de dær tehøjer, så tin kam da te, at a sku hjæm i plasan, får a hae int fri nyårsda, så a tjyr a stæ a hae 3 km. hjæm.
Dæ a var koman an hal km. var væj spær å snej, dær lå i røvlar på an hal m i høvdan, å såant var a hila væj hjæm, mæn de var int nåk.
Får da a kam te gåri, var eitjøslan loka mæ snej i halajan m høv snedruvar, (Mæn såm mæ seer, de ær i våj røv dæ bår hår je eigång ), så a mat jo tjyr åp te dæj næst muvlihjæ, såm åsa var loka, mæn så mat a jo tjyr ei å i markvej, baj omkring hønshust, å ei ijamal låan, så a ku få min knalart ei på plas.
Å næst mårn ku vå normal mjælkkusk int kom ijamal, så de var i nåbo dæ hint vå mjælkjunger, såm vi mat luut åp øvar snedryvarna .
Mæn bortsit får ålt de så gor de gåt.
Så no vel a jan ønsk jær an rejti gua jyvl, å gåt nytor.
Mæ vænli hjælsan frå Einar Schmidt.
Kilde: Skildringer fra det gamle Vendsyssel.
